Fimm keppendur komust áfram

Forkeppni fyrir Matreiðslumann ársins fór fram í Menntaskólanum í Kópavogi í dag. Keppnin var hörð í ár sem endranær og matreiðslumennirnir töfruðu fram hverja kræsinguna á fætur annarri.

Alls tóku 13 matreiðslumenn þátt í forkeppninni en af þeim komast aðeins fimm áfram. Aðalkeppnin, Matreiðslumaður ársins, fer svo fram á sýningunni matur 2006 um mánaðarmótin mars- apríl en þá þurfa kokkarnir að laða fram þriggja rétta máltíð fyrir dómnefndina. Það var líf og fjör í eldhúsinu þegar fréttamann bar að garði, andrúmloftið var þrungið spennu og já góðum matarilmi. Hrefna Rósa Jóhannsdóttir Sætran, aðstoðaryfirkokkur á Sjávarkjallaranum, er ánægð eftir daginn og taldi að sér hefði gengið vel. Hún segir að keppendur hafi átt að útbúa aðalrátt sem byggðist á lambahrygg og lambalæri fyrir tíu manns en uppskriftin sjálf væri keppanda að útbúa. Hrefna er eina konan sem keppti í keppninni og það sem meira er þá er hún jafnframt fyrsta konan sem tekur þátt. Hrefna er að vonum stolt af þátttöku sinni en segist ekki geta útskýrt af hverju fleiri konur séu ekki meðal þátttakenda.

Bjarki Hilmarsson, yfirmaður dómnefndarinnar og yfirmatreiðslumeistari á Hótel Geysi, hefur dæmt í forkeppninni síðan árið 1994. Hann segir keppendur hafa staðið sig vel og forkeppnin hafi verið hörð í ár. Bjarki segir alltaf jafn gaman að dæma í keppnum sem þessari en dómarar verði þó að passa sig á að klára ekki af diskum keppenda. Bjarki segir að stílhreint yfirbragð og gott bragð hafi einkenntrétti þeirra sem fóru áfram í aðalkeppnina.