Vilhjálmur Egilsson framkvæmdastjóri SA

Stjórn Samtaka atvinnulífsins hefur ákveðið að ráða Vilhjálm Egilsson í stöðu framkvæmdastjóra samtakanna. Vilhjálmur er ráðinn í stað Ara Edwald sem senn tekur við stöðu forstjóra 365 miðla.

Vilhjálmur hefur gengt stöðu ráðuneytisstjóra í sjávarútvegsráðuneytinu frá ársbyrjun 2004. Áður starfaði hann meðal annars fyrir Alþjóðagjaldeyrissjóðinn á árunum 2003 til 2004, sem framkvæmdastjóri Verzlunarráðs Íslands á árunum 1987 til 2003, sat á Alþingi á árunum 1991 til 2003 og starfaði hjá Vinnuveitendasambandi Íslands, eins forvera Samtaka atvinnulífsins, á árunum 1982 til 1987.

Vilhjálmur lauk cand. oecon prófi frá Háskóla Íslands árið 1977, MA prófi í hagfræði frá University of Southern California árið 1980 og doktorsprófi í hagfræði frá sama skóla árið 1982.