Lækkanir vegna verðstríðs gengnar til baka

Verðbólga nú í janúar mælist 4,4% sem er meira en spáð hafði verið. Hagfræðingur hjá ASÍ segir ljóst að áhrif verðstríðs síðasta vor á matvöruverð sé gengið til baka og sér ekki forsendur fyrir þeim hækkunum sem orðið hafa.

Neysluverðsvísitalan hækkaði um 0,32% frá því í desember sem er meira en spáð var. Matvæli og drykkjarföng hækkuðu um 2% á milli mánaða. Hagfræðingur hjá Alþýðusambandi Íslands segir ljóst að verðlækkanir eftir síðasta verðstríð lágvöruverslana síðasta vor séu að engu orðnar. Henný Hinz verkefnastjóri verðlagseftirlits hjá ASÍ segir lækkanirnar að öllu leyti gengnar til baka. Ef miðað er við neysluverðsvísitöluna er matvöruverð núna 1% lægra en í fyrra en á sama tíma hefur krónan styrkst um 8% sem ætti að skila sér í vöruverði til neytenda.

Guðmundur Marteinsson, framkvæmdastjóri, Bónusverslana, segir að ekki hafi dregið úr verðstríði lágvöruverslana. Og í sama streng tekur Árni Þór Freysteinsson, rekstrarstjóri Krónunnar. Þeir segja að hækkanirnar tengist birgjum og þeir fái ekkert við þær ráðið. Árni Þór segir að flestar þær vörur sem Krónan selji séu keyptar af innlendum birgjum. Auk þess var sérstakt umbúðagjald tekið upp síðustu áramót sem hafi áhrif. Að þeirra mati heldur samkeppni sem á markaðnum verðinu niðri. Henný telur hins vegar að hækkanirnar nú séu umfram það sem eðlilegt sé. Hún segir hækkun heildsöluverðs mjólkurvara og hækkun á kjöti vegna kjötskorts hafa áhrif á verð en fyrir utan það sé ekki innistæða fyrir þessum verðhækkunum.