Útbreidd reiði vegna skrifa DV

Eigendur Bónusverslananna fjarlægðu auglýsingar um DV úr verslunum í dag vegna umræðu um sjálfsvíg manns sem var til umfjöllunar á forsíðu og í fréttum blaðsins. Þá hvetja Samtök auglýsenda alla auglýsendur til að sniðganga blaðið og þingmaður Sjálfstæðisflokksins undirbýr frumvarp um bætta réttarstöðu þolenda í meiðyrðamálum og aukna vernd fyrir friðhelgi einkalífsins.

Baugur á 28 prósent í Dagsbrún sem á DV. Stjórn Dagsbrúnar kemur saman í fyrramálið til að ræða umræðu um DV og þrýsting á eigendur um að skipta sér af ritstjórnarstefnunni.

Sigurður Kári Kristjánsson hefur samið lagafrumvarp sem kveður á um breytingar á hegningarlögum og skaðabótalögum og felur í sér aukna vernd á friðhelgi einkalífs og ríkari skaðabótarétt þolenda í slíkum málum. Til að mynda er kveðið á um að bótafjárhæð skuli hafa verulega fjárhagslega þýðingu fyrir greiðandann. Hann telur víðtækan stuðning við málið í þjóðfélaginu ekki síst í ljósi atburða síðustu daga.

Samtök auglýsenda sendu frá sér tilkynningu í dag þar sem segir að það sé skaðlegt fyrir ímynd auglýsenda að auglýsa í blaðinu. Auglýsendur eru hvattir til að sniðganga blaðið þar til stjórnendur þess færi siðareglur þess til samræmis við siðareglur Blaðamannafélagsins.

Gunnar Lárus Hjálmarsson betur þekktur sem, doktor Gunni, sem var blaðamaður og pistlahöfundur DV í hjáverkum á menningarsíðum blaðsins hætti alfarið störfum fyrir blaðið í gær en hann segist hafa verið ósáttur við ritstjórnarstefnu blaðsins. Það komi einfaldlega að því að menn verði að gera upp við sig, hvað sé rétt og hvað sé rangt.

Hallgrímur Helgason einn vinsælasti pistlahöfundur DV segist segist sleginn yfir þessum síðustu tíðindum. Hann hafi þó ekki tekið neina ákvörðun um að hætta heldur ætli sér að hugsa málið.