Vilja auka einkarekstur í heilbrigðisþjónustu

Einkarekstur í heilbrigðisþjónustunni er það sem koma skal að mati Samtaka atvinnulífsins. Framkvæmdastjóri samtakanna telur að einkarekstur hafi gefið góða raun og hann vill sjá aukna þróun í þá átt.

Samtök atvinnulífsins kynntu nýtt rit um einkarekstur í heilbrigðisþjónustu í morgun. Í ritinu er meðal annars kynntar ítarlegar tillögur um hvernig megi bregðast við þeim áskorunum sem íslenskt heilbrigðiskerfi stendur frammi fyrir. Vilhjálmur Egilsson, framkvæmdastjóri Samtaka atvinnulífins segir að með auknum einkarekstri í heilbrigðisþjónustu, þá sé hægt að uppfylla þær þarfir sem eru til staðar með lægri kostnaði. Hann segir að einkarekstur hafi gefið góða raun og því beri að halda áfram á þeirri braut.

Alþingismenn eru ekki allir á eitt sáttur um ágæti einkareksturs í heilbrigðisþjónustu. Margir óttast að erfitt geti reynst að samræma einkareksturinn samhliða því kerfi sem fyrir er og að tekjuhærri einstaklingar í samfélaginu eigi þá greiðari leið að þjónustunni en aðrir. Vilhjálmur segir að heilbrigðisþjónusta eigi fyrst og fremst að vera fyrir sjúklinga. Með auknum einkarekstri séu hagsmunir sjúklinga hafðir að leiðarljósi og því ætti skík þróun að eiga upp á pallborðið hjá þingmönnum. Hann segir að ef ætlunin sé að hafa hagsmuni starfsmanna í heilbrigðisþjónustu að leiðarljósi, þá beri að halda áfram ríkisrekstri.