Litháar safna undirskriftum til heiðurs íslensku þjóðinni

Hafin er undirskriftasöfnun í Litháen til að þakka íslensku þjóðinni fyrir að hafa verið fyrst allra til að viðurkenna sjálfstæði landsins. Fram kemur í tilkynningu frá skrifstofu forseta Íslands að við hátíðlega athöfn í ráðhúsinu í Vilnius í gær hafi Ólafur Ragnar Grímsson, forseti Íslands, tekið á móti tilkynningu um undirskriftasöfnunina.

Tilkynninguna flutti Gintautas Babravisius talsmaður hóps almennra borgara sem ákvað að beita sér fyrir þessari undirskriftasöfnun. Markmiðið er að safna þrjú hundruð þúsund nöfnum, einu fyrir hvern Íslending.

Áformað er að afhenda undirskriftirnar á Íslandi í ágústmánuði, en þá eru liðin 15 ár frá því að Íslendingar viðurkenndu fyrstir þjóða sjálfstæði Litháen. Jafnframt er að því stefnt að efna til tónleika á Íslandi þar sem fram kæmu litháískir listamenn.