Fréttablaðið ekki laust við áreiti eigenda og yfirmanna?

Sú staðreynd að ritstjórnarfulltrúi Fréttablaðsins gat birt gagnrýninn leiðara um málsvörn framkvæmdastjóra 365-miðla gerði það að verkum að ég trúði því loks að Fréttablaðið væri laust við áreiti af hálfu eigenda og æðstu yfirmanna fyrirtækisins. Þetta skrifaði fyrrverandi formaður Samfylkingarinnar, nokkurn veginn orðrétt, í pistli á heimasíðu sinni í fyrradag, en um það bil á sama tíma var verið að segja ritstjórnarfulltrúanum upp störfum.

Össur Skarphéðinsson, fyrsti formaður Samfylkingarinnar, skrifaði pistil um ráðningu Þorsteins Pálssonar í stöðu ritstjóra hjá Fréttablaðinu á heimasíðu sína í fyrradag undir yfirskriftinni "Sættir Baugs við Sjálfstæðisflokkinn". Þar segir hann ráðninguna vera friðarpípu sem Baugur bjóði Sjálfstæðisflokknum, en eins og kunnugt er er Þorsteinn fyrrverandi formaður flokksins. En Össur segir að í fljótu bragði séu Baugsmenn að taka nokkra áhættu. Þorsteinn geri enga samninga fyrirfram um að hlífa einum eða neinum, og, að á skútunni sé fyrir skarpasti leiðarahöfundur sem skrifi í íslensk dagblöð í dag, þ.e. Guðmundur Magnússon. Össur segir hann ekki hika við að segja álit sitt þó það komi yfirmönnum hans illa, og bendir í því sambandi á leiðara sem Guðmundur skrifaði þegar DV-málið svokallaða stóð sem hæst á dögunum, sem endaði með því að ritstjórar blaðsins sögðu upp.

Í umræddum leiðara segir Guðmundur meðal annars að aðeins sé vit í þeirri reglu að eigendur og stjórnarmenmn fjölmiðlafyrirtækja virði sjálfstæði ritstjórna sinna, að þeir hafi markað meginstefnuna og þannig sé hægt að sækja þá til ábyrgðar, ekkert síður en ritstjórnirnar ef út af bregði. Össur segir orðrétt í pistli sínum: „Sú staðreynd að Guðmundur gat birt slíkan leiðara gerði það hins vegar að verkum að ég trúði því loks að Fréttablaðið væri laust við áreiti af hálfu eigenda og æðstu yfirmanna 365-miðla." Sama dag og Össur skrifar þetta var aftur á móti tilkynnt að Guðmundi hafi verið sagt upp sem ritstjórnarfulltrúi blaðsins.

Össur vildi ekki tjá sig um málið þegar eftir því var leitað í gærkvöldi.