Íslensk leyniþjónusta í bígerð?

Sérstök deild sem rannsakar hryðjuverk og skipulagða glæpastarfsemi verður starfrækt hjá embætti Ríkislögreglustjóra verði frumvarp dómsmálaráðherra til breytingar á lögreglulögum samþykkt á Alþingi. Þingmaður Samfylkingar óttast að verið sé að stofna eins konar leyniþjónustu.

Í minnisblaði sem Björn Bjarnason, dómsmálaráðherra lagði fram á ríkisstjórnarfundi í morgun kemur fram að meðal meginatriða frumvarpsins sé stofnun greiningardeildar sem leggi mat á áhættu vegna hryðjuverka og skipulagðrar glæpastarfsemi. Deildin muni endurspegla þróun hjá lögregluembættum nágrannalandanna og auðvelda íslenskum lögregluyfirvöldum samstarf við þær deildir í öðrum löndum sem greini og meti hættu á afbrotum sem oftast teygi sig til margra landa og kennd eru við skipulagða eða alþjóðlega glæpastarfsemi og hryðjuverk.

Í minnisblaðinu segir að ákvæði um greiningardeild eigi að tryggja að þannig verði um hnúta búið að þeir sem gæti öryggis borgaranna hafi sambærilegar lögheimildir og starfsbræður þeirra erlendis til að sinna störfum sínum. Með ákvæðum um greiningardeild sé verið að leggja lögregluyfirvöldum til tæki sem verði beitt í samræmi við heimildir í lögum um meðferð sakamála. Auk þessa er lagt til að dómsmálaráðherra verði heimilt að stofna greiningardeild við önnur embætti lögreglustjóra ef sérstök rök standi til þess.