Pólskir innflytjendur ekki fyrir íslenska fjölmiðla

Meirihluti pólskra innflytjenda á Íslandi les hvorki íslensk blöð, né horfir á íslenskt sjónvarp, en flestir innflytjendur eru frá Póllandi. Þetta kom fram í dag þegar hleypt var af stokkunum útvarpssendingum á erlendum tungumálum fyrir nýbúa.

Fjölmiðladeild Flensborgarskóla í Hafnarfirði og Alþjóðahús standa að útvarpssendingunum ásamt lýðræðis-og jafnréttisnefnd Hafnarfjarðar. Bæjarstjóri Hafnarfjarðar Lúðvík Geirsson var fyrsti viðmælandi stöðvarinnar og svaraði spurningum á ensku.

Um er að ræða tilraunaverkefni og verður útvarpað á allt að þrettán tungumálum fjórum sinnum í víku, í hálftíma í senn. Sent er út á tíðni Flensborgarskólans á FM 96.2 en einnig er hægt að nálgast útsendingarnar á vef Hafnarfjarðarbæjar, www.hafnarfjordur.is.

Aðallega verður útvarpað á pólsku, rússnesku, tagalog (Filippseyjar) og ensku.

Amal Tamimi er formaður lýðræðis og jafnréttisnefndar Hafnarfjarðar og upplýsingaafulltrúi Alþjóðahúss. Hún fékk hugmyndina fyrir þremur árum og vonast til að útvarpssendingarnar verði bráðum einnig á landsvísu og útilokar ekki sjónvarpsútsendingar. Hún segir vera skort á upplýsingum til innflytjenda. Þá segir hún suma innflytjendur jafnvel ekki vera læsa á eigin tungumáli, hvað þá íslensku, þess vegan gagni upplýsingabæklingar þeim hópi lítið.

María Valgeirsson hefur búið á Íslandi í 18 ár og rekur veitingastaðinn Stokrotka og Pólsku verslunina í Hafnarfirði. Hún segir pólverja nánast einungis horfa á pólskt sjónvarp, enda séu flestir þeirra með gervihnattamóttakara. Hún telur það ástæðu þess að þeir tali gjarnan slæma eða enga íslensku.