Safngripum fleygt úr Ellingsen húsinu

Tímaritum, bókum og blöðum var mokað út úr gamla Ellingsen húsinu við Grandagarð í dag. Mörg ritanna voru meira en hundrað ára gömul og voru í eigu landskunnra einstaklinga. Það var unnandi hins ritaða orðs sem hringdi á fréttastofu NFS með þær fréttir að verið væri að fleygja safngripum. Hann hringdi líka í Landsbókasafnið sem sendi fulltrúa á staðinn en þeir fúlsuðu við gersemunum.

Húsið var í eigu Reykjafells en Ellingsen leigði það. Á háaloftinu var gamalt safn tímarita, dagblaða og bóka í einkaeigu.

Þegar húsið var rýmt bauð Olís, eigandi Ellingsen, borgarskjalaverði gömul bókhaldsskjöl sem fundust í húsinu, en ritasafnið er ekki í þeirra eigu. Eigandinn auglýsti víst sölu á ritunum fyrir skömmu síðan. Líklega hefur salan verið dræm og því eru þetta örlög safnsins. Vert er að geta þess að söfnurum er velkomið að gramsa í gámnum og hirða það sem þeir vilja.