Vegstyttingu framhjá Blönduósi hafnað

Þessi vegstytting er með allra hagkvæmustu framkvæmdum sem fyrirfinnast í landinu, samkvæmt nýlegri úttekt Rannsóknarstofnunar Háskólans á Akureyri fyrir Leið ehf. Það félag beitti undirbjó jarðveginn fyrir vegagerð um Arnkötludal á Vestfjörðum en tilgangur þess er að beita sér fyrir einkafjármögnun samgöngumannvirkja.

Félagið vill nú ráðast í nýtt verkefni og hefur sent Skipulagsstofnun drög að tillögu að mati á umhverfisáhrifum nýs 16 km langs vegar sem félagið nefnir Húnavallabraut, en hann myndi liggja frá Stóru-Giljá og þvert inn í miðjan Langadal með nýrri brú á Blöndu. Samkvæmt úttekt Háskólans á Akureyri er samfélagslegur ábati þessarar styttingar metinn á 2,6 milljarða króna og arðsemi verkefnisins 27 prósent.

Við gerð svæðisskipulags Austur-Húnavatnssýslu óskaði Vegagerðin eftir því í febrúar í fyrra að nýtt vegarstæði hringvegarins þarna yrði sett inn á skipulag. Sameiginleg nefnd sveitarfélaga á svæðinu hafnaði þeirri ósk með þeim orðum að það væri samdóma álit heimamanna að lega hringvegar væri á allan hátt farsælust fyrir héraðið um Blönduós þar sem Blönduós væri aðalþjónustukjarni og miðstöð héraðsins. Töldu Austur-Húnvetningar raunar heppilegra að hringvegurinn yrði í framtíðinni lagður norður fyrir Blönduós, um Þverárfjall, Sauðárkrók, Hjaltadal og um jarðgöng yfir í Barkárdal og þaðan til Akureyrar. Synjun Austur-Húnvetninga á nýju vegarstæði framhjá Blönduósi fór fyrir Skipulagsstofnun, sem afgreiddi hana án athugasemda til Sigríðar Önnu Þórðardóttur umhverfisráðherra. Þann 23. mars síðastliðinn staðfesti ráðherrann nýtt svæðisskipulag Austur-Húnavatnssýslu sem gildir til ársins 2016 þar sem ekki er gert ráð fyrir vegstyttingu. Skipulagsstofnun á hins vegar enn eftir að afgreiða ósk Leiðar ehf. um að vegurinn verði settur í umhverfismat.