Mótmæli gegn forseta Taiwan

Tugir þúsunda mótmælenda fylktu liði í Taipei á þjóðahátíðardegi Taiwan, sem er í dag. Þeir fara fram á að forsetinn, Chen Shui-bian, segi af sér vegna ásakana um spillingarmál sem tengjast fjölskyldu hans.

Í hátíðarræðu sem forsetinn hélt í tilefni dagsins, fullyrti hann að hann fylgdi heiðarlegum stjórnarháttum. Hann sagði að sem forseti hefði hann stjórnarskrár-bundna skyldu og að hann myndi sitja áfram þá nítján mánuði sem hann á eftir af tímabilinu, þrátt fyrir mótmælin.

Lögregla sagði að yfir tuttugu þúsund mótmælendur hefðu safnast saman á breiðgötunni utan við Forsetaskrifstofuna. Síðustu tvo mánuði hafa mótmælendur látið að sér kveða á götum landsins.