Ásgeir ætlaði ekki að særa neinn

"Auðvitað er leiðinlegt ef fólk misskilur það sem maður segir og jafnvel sárnar," segir Ásgeir Kolbeinsson fjölmiðlamaður en viðtal við hann í þættinum Innlit/útlit, sem sýndur var á Skjá einum á þriðjudag, hefur valdið fjaðrafoki.

Skjá einum bárust margar kvartanir eftir þáttinn, þar sem Arnar Gauti ræddi við Ásgeir um endurbætur sem hann réðst í á heimili sínu. Fór fyrir brjóstið á mörgum að tvímenningarnir notuðu orð á borð við "viðbjóður" og "ógeð" til að lýsa því sem virtust venjulegar innréttingar.

Ásgeir er leiður yfir málinu og segir það á misskilningi byggt. "Ég keypti þessa íbúð gagngert til að gera hana upp og fékk hana á lægra verði því hún var í svo slæmu ásigkomulagi."

Hann segir hluti oft líta betur út í sjónvarpi en í raun og veru og myndavélin hafi ekki fangað alls kyns ófögnuð sem þeir Arnar voru að vísa til. "Ég ætlaði hvort eð er að rífa allt út þannig íbúðin hafði ekki verið þrifin lengi; komin væg ólykt inn á klósett, parketið flagnað, veggir útbarðir og hurðirnar rispaðar en það sást ekki á myndunum. Við vorum bara að tala um slíka hluti."

Ásgeir segir að líklega hefði verið skynsamlegt að vanda orðavalið betur. "Við Arnar erum vinir og töluðum á kumpánlegum nótum. Það átti eftir vill ekki við þarna." Mest sárnar honum að sumir túlka orð þeirra Arnars sem snobb og flottræfilshátt. "Okkur þykir það báðum leiðinlegt því þetta snerist engan veginn um það. Sjálfur skít ég ekki peningum en það hefur lengi verið draumur minn að kaupa íbúð og gera hana upp. Loksins rættist hann."