Rektor segist ekki vera að forðast málssókn

Háskólarektor hafnar því að hann sé að forðast málssókn með því að bjóða Steinunni Kristjánsdóttur fornleifafræðingi starf. Atvinnutilboðið kom stuttu eftir að Steinunn tilkynnti að hún myndi leita réttar síns gagnvart skólanum vegna ráðningar í aðra stöðu.

Tveir sóttu um stöðu lektors í fonleifafræði við Háskóla Íslands, Gavin Lucas og Steinunn Kristjánsdóttir. Dómnefnd var skipuð til að meta umsóknir. Formaður hennar var Orri Vésteinsson lektor í fornleifafræði og stjórnarmaður í Fornleifastofnun Íslands, einkafyrirtæki sem annast fornleifarannsóknir. Annar umsækjendanna, Gavin Lucas, starfar hjá fyrirtækinu samkvæmt upplýsingum á heimasíðu þess. Dómnefnd mat báða umsækjendur hæfa og í framhaldinu kaus sagnfræðiskor að Steinunn yrði ráðin á grundvelli álitsins.

Næst fór málið samkvæmt heimildum NFS inn á deildarfund hugvísindadeildar þar sem Orri Vésteinsson tók til máls og mælti sterklega með að áliti sagnfræðiskors yrði hafnað og Gavin Lucas ráðin í stað Steinunnar. Þetta samþykkti fundurinn og var ráðning Gavin loks staðfest af Kristínu Ingólfsdóttur, rektor Háskólans. Eftir að Steinunn lét í ljós óánægju sína og lýsti því að hún myndi höfða mál á hendur Háskólanum vegna brota á stjórnsýslu- og jafnréttislögum, vegna tengsla Gavins og Orra auk þess að umsækjendur hafi verið jafn hæfir og því hafi átt að ráða konu í starfið. Steinunn staðfesti við NFS í dag að hún hefði íhugað að fara í mál við Háskólann.

Kristín Ingólfsdóttir rektor segir að mat hafi verið gert á hæfi Orra og það staðist reglur skólans. Hún vísar því sömuleiðis á bug að hæfi þeirra hafi verið jafnt og vísar þar í deildarfundinn umrædda. Þrátt fyrir þetta hefur rektor séð ástæðu til - eftir að Steinunn gerði sínar athugasemdir - að bjóða henni nýtt starf án auglýsinga sem rektor telur vera heimilt samkvæmt reglum skólans um samstarf við aðrar stofnarnir. Hún segir að með því sé hún þó alls ekki að friða Steinunni og koma í veg fyrir málssókn.