Yfirlýsing frá stjórn Dagsbrúnar

Stjórn Dagsbrúnar ræddi á fundi sínum í dag málefni dagblaðsins DV í kjölfar hinna hörmulegu atburða á Ísafirði og samþykkti yfirlýsingu. Misfórst að senda NFS tilkynninguna og því birtist hún ekki hér fyrr en nú.

Í yfirlýsingunni segir:

Stjórnin virðir þá ákvörðun ritstjóra DV að láta af störfum.

Vegna umræðu undanfarinna daga um ábyrgð eigenda og stjórnar á efni fjölmiðla á vegum dótturfélagsins 365 tekur stjórnin fram að hún starfar eftir starfsreglum þar sem m.a. er kveðið á um að stjórnarmönnum sé óheimilt að hlutast til um einstök umfjöllunarefni fjölmiðla í eigu félagsins. Aðkoma stjórnarinnar að fjölmiðlunum felst í almennri stefnumótun.

Stjórnin ítrekar að Dagsbrún stendur vörð um tjáningarfrelsi, prentfrelsi, upplýsingafrelsi og gildi lýðræðis og mannréttinda. Félagið virðir grundvallarreglur frjálsrar blaðamennsku og leggur áherslu á sjálfstæði ritstjórna, m.a. gagnvart eigendum, auglýsendum, hagsmunahópum og opinberum aðilum. Félagið þjónar almenningi í landinu og vill eiga traust hans og vera jákvætt afl til umbóta, meðal annars með því að hlúa að gagnrýninni, sjálfstæðri og óháðri umræðu, innan ramma gildandi laga.

Fyrir hönd stjórnar Dagsbrúnar hf.

Þórdís J. Sigurðardóttir

formaður