Búa í tjaldi

Pólverji sem vinnur á hóteli í Reykjavík hefur þurft að hírast í tjaldi í tvær vikur og sér ekki fyrir endann á því. Nokkrir aðrir Pólverjar sem komu hingað í leit að vinnu eftir fyrsta maí eru nágrannar hans á tjaldstæðinu í Laugardal.

Prznek Gdak og Robert Makovski komu hingað til lands í leit að vinnu eftir að lög um vinnuafl frá nýju löndum Evrópusambandsins breyttust í byrjun maí. Þeir hafa nú fengið vinnu og húsnæði, eftir að hafa búið í þessu tjaldi síðan þeir komu til landsins.

Andrzej Hara er tvítugur Pólverji sem hefur verið hér í einn og hálfan mánuð. Eftir að hann missti herbergið sitt á gistiheimili í borginni hefur hann búið í tjaldi. Þó að hann vinni á hóteli er það skammgóður vermir, því að þar býðst honum herbergi á níutíu þúsund, sem er svipað og hann fær í laun á mánuði. Nú er allt blautt nema skórnir. Hann segist samt ekki svartsýnn á framtíðina, þó að vissulega sé það erfitt þegar maður búi í tjaldi.

Margrét Valgeirsson, sem rekur pólsku búðina í Hafnarfirði segist hafa heyrt af mörgum Pólverjum sem búi í tjaldi hér á landi á meðan þeir leiti sér að vinnu, en hún hafi ekki áður orðið beinlínis vitni að því.