Ný dansmynd unnin í Svíþjóð

Dansarinn og danshöfundurinn Helena Jónsdóttir er á leið til Svíþjóðar að vinna að dansverki fyrir sjónvarp í samstarfi við vel þekkta listamenn þar í landi.

Helena hefur unnið að fjölda dansverka en flest þeirra hefur hún skrifað sjálf og leikstýrt, hvort sem það fyrir sjónvarp, tónlistarmyndbönd eða svið. Verkefnið í Svíþjóð vinnur hún ásamt þremur Svíum sem allir eru vel þekktir á sínu sviði í heimalandinu. Leikarinn Lars Bethke leikur aðalhlutverkið í dansverkinu, rithöfundurinn Irena Kraus skrifar handritið og Helena sér um leikstjórn og danshönnun. Að sögn Helenu mun hópurinn vinna ásamt tökuliði að kynningarefni myndarinnar í Stokkhólmi en tökur á myndinni sjálfri, sem verður 16 mínútur að lengd, hefjast í haust. "Það er gífurlega spennandi að vinna með þessu fólki enda er um mikla listamenn að ræða. Leikarinn sem um ræðir hefur leikið í fjölda mynda í heimalandi sínu og Irena Kraus skrifað fjölda leikrita fyrir útvarp, en hún er hvað þekktust fyrir að vinna sem hægri hönd Mats Eek, sem er einn þekktasti danshöfundur Svía."

Á síðasta ári vann Helena að dansverkinu Another með Eistneska sjónvarpinu en það var tekið upp í Tartu fangelsinu sem er fyrsta sinnar tegundar í landinu. "Fangelsið var opnað árið 2002 og geymir 800 fanga en það sem veitti mér innblástur að hluta er sú staðreynd að síðan fangelsið opnaði hafa fjögur náin samband myndast milli fanga og fangavarða. Þrátt fyrir rammgirta steinsteypta veggi og einangrun, snýst verkið um sambönd, raunverulegar tilfinningar og spurninguna um að taka ábyrgð á okkar eigin frelsi."

Fyrir utan eistneska sjónvarpið hefur dansverkið Another einnig verið sýnt víða annars staðar, samanber norska, sænska, danska og þýska ríkissjónvarpinu, auk þess sem sjónvarpstöðin Arte kaus verkið sem bestu dansmynd árið 2005. "Another hefur hlotið góðar viðtökur en í Svíþjóð fékk hún 200 þúsund manna áhorf þrátt fyrir að hún var ekki auglýst sérstaklega. Leikarinn í myndinni sem er eistneskur, heitir Mait Malmsten en hann er eins og Ingvar Sigurðsson okkar Íslendinga, sem ég ber mikla virðingu fyrir."