Samstarf um upplýsingamiðlun úr ökutækjaskrá

Samstarf hefur verið tekið upp á milli Umferðarstofu og ríkisskattstjóra um upplýsingamiðlun úr ökutækjaskrá Umferðarstofu á vefsíðu ríkisskattstjóra.

Samstarfið felur í sér að einstaklingar geta óskað eftir upplýsingum um ökutækjaeign sína úr ökutækjaskrá og sótt svokallaða ferilskýrslu um hvert ökutæki sem inniheldur ítarlegar upplýsingar um það. Með þessu er einstaklingum auðveldað aðgengi að upplýsingum sem varða þá sjálfa en það er í samræmi við það grundvallarsjónarmið að fólk eigi rétt á að fá að vita hvað er skráð um það og þeirra hagsmuni í opinberum skrám.

Samstarf Umferðarstofu og ríkisskattstjóra er liður í uppbyggingu rafrænnar stjórnsýslu ríkisvaldsins en stefnt er að því að nýta aðgangskerfi framteljenda á vefsíðu ríkisskattstjóra til þess að auðvelda aðgengi að upplýsingum og þjónustu annarra stofnana sem eru í samstarfi við ríkisskattstjóra.