Íslensk stúlka hætt komin

Íslensk stúlka var hætt komin þegar henni var haldið í gíslingu í Naíróbí í Keníu í um tvær klukkustundir. Fimm menn réðust inn á heimilið sem hún bjó á, vopnaðir byssum og ógnuðu heimilisfólki.

Atvikið átti sér stað föstudaginn 13. janúar síðast liðinn. Stúlkan var í Kenýu á vegum AUS, alþjóðlegu ungmennaskiptunum, og var nýbyrjuð sexmánaða vist sem sjálfboðaliði. Fimm menn réðust inn á heimilið þar sem stúlkan bjó, vopnaðir byssum og héldu fólki gíslingu í um tvær klukkustundir. Þeir beittu fólkið ofbeldi og er stúlkan með talsverða áverka eftir árásina. Strax að árásinni lokinni var kallað til lögreglu sem síðan hafði samband við lögregluna í Reykjavík og hafa þær samvinnu í málinu. Stúlkan er nú komin heim ogg hefur fengið áfallahjálp. Allir sjálfboðaliðar á vegum AUS eru tryggðir og er nú verið að vinna í að bæta stúlkunni tjónið sem var talsvert en nánast öllu verðmæti stúlkunnar sem og heimilsfólksins var stolið. AUS leggur ríka áherslu á að heimili sem sjálfboðaliðar á þeirra vegum búa á séu örugg og svo var einnig í þessu tilfelli.