Rak stílistann fyrir að ýta undir átröskun

Nicole Richie hefur nú rekið góðvinkonu sína og stjörnustílistann Rachel Zoe og hefur ásakað hana um að ýta undir átröskun hjá viðskiptavinum sínum. Richie gefur þetta út á heimasíðu sinni þar sem hún talar um að Zoe sé svo illa haldin af átröskun sjálf að hún reyni eftir bestu getu að hafa áhrif á alla í kringum sig.

„Rachel er með sérstakar pillur sem hún dreifir til viðskiptavina sinna sem hjálpar þeim að verða óeðlilega léttar," segir Richie en hún hefur grennst mikið síðustu ár og verið ásökuð í fjölmiðlum um að vera haldin átröskun.

Stjarna Zoe hefur risið hátt síðustu ár og er hún einn eftirsóttasti stílisti í Hollywood í dag. Meðal viðskiptavina Rachel Zoe eru Lindsay Lohan, Mischa Barton og Kate Bosworth en þær hafa allar grennst óeðlilega mikið upp á síðkastið sem ýtir enn frekar undir ásakanir Nicole Richie á hendur Zoe. Zoe hefur neitað alfarið fyrir alltsaman og segir að Richie og hún skilji í góðu og ætli að halda áfram að vera góðar vinkonur.