Stjórnar þætti í spænsku sveitaútvarpi

Flökkukindin Jón Sigurður Eyjólfsson hélt á vit ævintýranna fyrir skömmu og fluttist til smábæjarins Carbonero sem er á spænsku hásléttunni en hann á þar spænska dóttur.

Þar sinnir Jón einkakennslu í ensku fyrir fyrirtæki og einstaklinga en á milli kennslustunda leyfir hann íbúum bæjarins að njóta tónlistarsmekks síns á útvarpsstöð bæjarins, Carbonero Radio. „Ég vissi nú bara af þessari útvarpsstöð og vildi láta til mín taka,“ svarar Jón Sigurður þegar hann er spurður hvernig standi á því að hann stjórni útvarpsþætti í smábæ. „Þátturinn heitir Strengjað vegabréf en í hverri viku tek ég fyrir eitt land og spila tónlist frá því,“ segir Jón Sigurður sem leggur mikinn metnað í útvarpsþáttinn, hefur spilað lög frá Grikklandi og ætlar í næstu viku að taka á móti búlgörskum og rúmenskum íbúum bæjarins og fá þá til að segja frá landi og þjóð.

Íslandi hefur að sjálfsögðu verið gert hátt undir höfði og tók útvarpsmaðurinn meðal annars fyrir gamla heimabæinn sinn Bíldudal. „Ég sagði frá gömlum prakkarastrikum mínum þar, kynnti Jón Kr. Eyjólfsson og spilaði tónlist eftir sveitunga mína,“ útskýrir Jón og bætir við að hann ætli að taka Bubba Morthens fyrir í næsta þætti. „Íbúunum fannst þetta stórmerkilegt enda hafa margir hverjir ekki einu sinni séð sjóinn,“ útskýrir Jón.