Í tísku að vera grannur

Ekki er langt síðan því var lýst yfir að magrar fyrirsætur væru ekki lengur eftirsóttar. Þetta virðist ekki eiga við í Hollywood þar sem fremstu leikkonurnar verða grennri með hverri mynd sem þær leika í.

Í áranna rás hefur útlitsdýrkun nútímasamfélagsins breyst og aukist. Helst má það sjá á Hollywood-stjörnunum sem virðast verða grennri og grennri með árunum. Það er greinilegt að það er svalt að vera sem grennstur í englaborginni ef markja má útlit leikkvennanna sem vinsælastar eru um þessar mundir. Hinar kvenlegu línur eiga víst ekki upp á pallborðið hjá kvikmyndaframleiðendum vestanhafs og hafa leikkonurnar lýst því yfir að mikil pressa sé á þeim að líta vel út. En er fallegt að vera með útstæð bein og innfallinn maga? Er þetta ekki komið langt út fyrir almenna skynsemi?

Hin nýja kynslóð leikkvenna í Hollywood virðist vera þeirra skoðunar að því grennri sem þær eru því betra. Leikkonur á borð við Kate Bosworth, Lindsay Lohan, Keiru Knightley og síðast en ekki síst Nicole Richie, sem hefur vakið mikla athygli fyrir grannan vöxt sinn, eru góð dæmi um þessa þróun. Ef litið er á gamlar og nýjar myndir af þessum stöllum sést að útlit þeirra hefur breyst til muna á stuttum tíma og eru þær meira í ætt við gangandi beinagrindur en hraustlegar ungar stúlkur.

Nú hafa leikkonurnar Scarlett Johansson og Kate Winslet sagt útlitsdýrkuninni í Hollywood stríð á hendur og segjast aldrei ætla að fara í megrun fyrir hlutverk í bíómynd. Þær hafa meðal annars sagst vera ánægðar með sinn kvenlega vöxt og vilja þær vera ungum stúlkum góðar fyrirmyndir. En grindhoruðu leikkonurnar hafa greinilega mikil áhrif, enda eykst tíðni átröskunarsjúkdóma geigvænlega.