Árni fékk á baukinn hjá Bubba

Bubbi Morthens vakti ekki mikla kátínu meðal Eyjamanna þegar hann hélt tónleika í Höllinni fyrir hálfum mánuði en þar lét tónlistamaðurinn Árna Johnsen óspart heyra það og taldi það með ólíkindum að "glæpon færi á þing," svo vitnað sé til umsagnar um tónleikanna á Eyjar.net.

"Slíkt gerðist hvergi annars staðar í heiminum nema kannski í Afganistan." Bubbi rifjaði jafnframt upp atvik sem átti sér stað á Þjóðhátíð fyrir tveimur árum þegar Árni var sagður hafa slegið til söngvarans Hreims Arnar Heimissonar á sviðinu í Herjólfsdal en Árni neitaði öllum ásökunum í sjónvarpi á sínum tíma. Bubbi bar hins vegar vitni í Höllinni að þingmaðurinn fyrrverandi hefði logið að þjóðinni.

Jóhann Ingi Árnason skrifar um tónleikanna á áðurnefndum vef og hann sagði í samtali við Fréttablaðið að áhorfendurnir hefðu skipst í tvær fylkingar. Sumir hefðu hlegið að þessum skotum Bubba en öðrum hefði vart stokkið bros á vör. "Þetta er orðið gamalt og leiðinlegt mál og það er enginn að pæla í þessu lengur," segir Jóhann Ingi.

Tónlistamaðurinn sjálfur sat hins vegar fastur við sinn keip og taldi Eyjar hafa verið hárréttan stað til að gera grín að Árna Johnsen, framboði hans og lyga þingmannsins fyrrverandi í kringum kjaftshöggið. "Menn halda að bitið hafi orðið beiskt vegna velgengni minnar en því fer fjarri sanni," sagði Bubbi. "Ef menn geta ekki tekið því að ég hafi skoðun á framboði Árna Johnsen þá verður bara svo að vera," bætir Bubbi við. "Kannski skammast Eyjamenn sín svolítið fyrir Árna og þess vegna má ekki tala um þetta," segir Bubbi og upplýsir jafnframt að viðbrögðin hafi komið honum á óvart. "Ég hef hins vegar ekkert annað en gott um Vestmannaeyjar að segja og mörg af mínum bestu lögum urðu þar til."