Pílagrímsferð Nexusnörda til Alans Moore

Hann var mjög almennilegur og tók okkur íslensku nördunum mjög vel, segir Pétur Yngvi Yamagata í myndasögubúðinni Nexus um hinn goðsagnakennda myndasöguhöfund Alan Moore sem hann hitti á Englandi nýlega.

Starfsfólk búðarinnar lagði land undir fót og fór í pílagrímsferð til þess að hitta Moore sem er óumdeildur risi á sínu sviði. Þetta var sannkölluð pílagrímsferð og allt starfsliðið fór þannig að við þurftum að þjálfa upp afleysingafólk til þess að standa vaktina á meðan.

Moore er höfundur sígildra myndasagna eins og The Watchmen, V for Vendetta, From Hell og The League of Extraordinary Gentlemen og þykir með þeim allra beittustu í bransanum og Pétur og félagar hafa því eðlilega lengi alið þann draum í brjósti að ná fundi hans.

Hópurinn hitti meistarann á málþingi þar sem hann ræddi um nýjustu bók sína, hina klámfengnu Lost Girls, og svaraði spurningum áheyrenda. Þetta var í raun bara Alan Moore að tala um kynlíf í klukkutíma og var mjög gaman, segir Pétur sem er að vonum hæstánægður með að hafa hitt höfundinn þar sem hann er þekktur einfari og gefur sjaldan færi á sér. Ég reyndi á sínum tíma að bjóða honum að koma til Íslands en hann afþakkaði það kurteisslega og sagðist ekki fara úr landi og helst ekki út úr húsi.

Pétur segir nýjustu bók Moores hafa fengið mjög blendnar móttökur enda sé bókin í grófari kantinum. Hún kemur ekki út í Bretlandi fyrr en eftir ár vegna höfundarréttarmála en í sögunni er Pétur Pan mjög virkur í kynlífinu og bókin fæst því ekki útgefinn í landinu fyrr en einkaréttur Great Ormond-barnaspítalans á sögunni um Pétur Pan eftir J.M. Barrie, rennur út á næsta ári.

Moore áritaði verk sín eftir fyrirlesturinn en Íslendingarnir höfðu ekkert handa honum að skrifa á. Við vorum þó með gjafir handa honum og færðum honum Eddukvæði, Íslendingasögurnar og Avoid Us eftir Hugleik sem við sögðum honum að væru Wathcmen okkar Íslendinga. Hann hafði að vísu lesið hana þar sem dóttir hans er á kafi í myndasögum og hafði bent honum á hana og hann lét það fljóta með að Hugleikur væri mjög geðveikur og mjög, mjög fyndinn.