Kílóin fokin af Árna Johnsen

Tökum á raunveruleikaþáttaröðinni Frægir í formi er lokið, en hún mun fara í loftið á Skjá Einum um leið og sýningum á Celebrity Overhaul, sem byggir á sömu hugmynd, lýkur. Árni Johnsen var einn frægra þátttakenda í yfirhalningunni. „Allir skiluðu fínum árangri og nokkur kíló fuku af fólki,“ sagði hann, en má ekki gefa upp nákvæman fjölda fokinna kílóa. „Þetta hafðist allt með blússandi hreyfingu og dálítið öðruvísi mataræði,“ sagði hann, en Árni segist að jafnaði hafa gengið um fimm kílómetra á dag og synt einn kílómetra þar að auki.

Til að byrja með dvaldi hópurinn í eina viku á Sólheimum í Grímsnesi þar sem hann tók þátt í stífum heræfingum. Árni segir heragann ekki hafa farið fyrir brjóstið á íslensku keppendunum, en Ástralirnir í Celebrity Overhaul urðu margir hverjir geðstirðir eftir sambærilegar æfingar. „Nei, þetta var ofsalega góður hópur sem small vel saman. Það voru allir jákvæðir og röggsamir, fólk hafði gaman af þessu þó þetta væri púl,“ sagði Árni og bætti því að hann gæti hugsað sér að mæta á æfingar hjá Bootcamp í framtíðinni. „Ég fékk ekkert ógeð á heræfingunum. Þetta voru krefjandi æfingar, en ég ætti að þola slíkt. Ég er sjálfur kröfuharður,“ sagði Árni.