Löggan þjarmar að Jóhannesi

Jóhannes Kr. Kristjánsson, ritstjóri Kompáss, hefur verið yfirheyrður hjá fíkniefnadeild Lögreglunnar með réttarstöðu sakbornings vegna eiturlyfjaviðskiptaviðskipta sem hann stóð fyrir og sýndi í fréttaskýringaþættinum í síðustu viku. Varsla fíkniefna er ölögleg og þó ég hafi ekki keypt efnin sjálfur má segja að ég sé höfuðpaurinn í málinu, segir Jóhannes sem fékk unga tálbeitu til þess að kaupa eiturlyf sem hann skilaði síðan til lögreglu.

Þetta var alvöru yfirheyrsla og það var lagt hart að mér að gefa upp nöfn tálbeitunnar og fíkniefnasalanna en ég gef ekki upp nein nöfn og vernda auðvitað mína heimildarmenn.

Aðspurður segist Jóhannes þó ekki líta á meinta fíkniefnasala sem heimildarmenn en það sé ekki í sínum verkahring að upplýsa sakamál, það sé lögreglunnar. Jóhannes gerir ráð fyrir að lögreglan fari fram á að fá allar upptökur og fari svo ætli hann ekki að verða við þeirri kröfu.

Ég mun alrei láta upptökurnar af hendi, segir Jóhannes og vísar aftur til verndar heimildarmanna sinna. Við gætum þess vel að andlit fólks og raddir þekkist ekki á þeim upptökum sem við sýnum í sjónvarpinu og munum halda því áfram í verkefnum sem þessu.

Jóhannes segir tilganginn með tálbeituviðskiptunum hafa verið að kanna hversu greiðan aðgang ungt fólk hefði að fíkniefnum. Það kom mér verulega á óvart hversu auðvelt tálbeitan átti með að koma sér í samband við fíkniefnasalann og ganga frá viðskiptunum.

Jóhannes bíður nú þess sem verða vill og fylgir fíkniefnamálinu eftir í Kompás á sunnudaginn og sýnir þá upptökur frá frekari eiturlyfjakaupum tálbeitunnar.