Framfylgdu ekki reglum

Þetta er mál sem kom upp strax og það er búið að glíma við það, segir Jónatan Garðarson, talsmaður Eurovision-keppninnar hérlendis um þá kvörtun sem hefur borist vegna dónalegs orðalags í enskum texta lagsins Til hamingju Ísland með Silvíu Nótt. Er farið fram á að laginu verði vísað úr keppni ef textanum þar sem blótsyrðið kemur fyrir verði ekki breytt.

Upphaflegi textinn sem við fáum og sjónvarpsstöðvarnar eru ekki með þessu orði inni en síðan er það á smáskífunni sem þau gáfu út með hinu orðalaginu. Þau sendu frá sér opinberan texta og voru búin að lofa að fylgja reglum og þær eru skýrar, segir hann en vill ekkert geta sér til um hvort framhald verði á málinu og hverjar afleiðingarnar yrðu þá.

Eurovision-fararnir héldu til Aþenu í morgun og hefjast æfingar fyrir íslenska lagið á föstudag. Keppendur fá tvær foræfingar og síðan þrjú svokölluð rennsli þar sem lagið verður prufukeyrt uppi á sviði. Forkeppnin hefst síðan fimmtudaginn 18. maí.

Jónatan segist ekki gera sér grein fyrir möguleikum íslenska lagsins í Eurovision. Ég hef ekki hlustað á neitt af hinum lögunum, segir hann. Ég hef litið á vefsíður þar sem menn eru að spá upp og niður en það er aldrei neitt að marka það.