Innkaupasamlag gegn háu lyfjaverði

Siv Friðleifsdóttir heilbrigðisráðherra segir að ráðuneytið sé með það til skoðunar að setja upp innkaupasamlag lyfja ásamt Tryggingastofnun og heilbrigðisstofnunum. Þetta yrði gert til að vinna gegn háu lyfjaverði.

Ráðherra hefur sent bréf til Lyfjastofnunar þar sem stofnunin er beðin um að brýna fyrir lyfjafræðingum að upplýsa sjúklinga um ódýrari samheitalyf, sé verðmunur frumlyfja og samheitalyfja meiri en fimm prósent.

Jafnframt er stofnunin beðin um að ítreka "þær heimildir sem hún hefur samkvæmt lyfjalögum til að knýja á um úrbætur, sé ástæða til að mati stofnunarinnar, svo sem að veita áminningu sem getur verið undanfari leyfissviptingar," eins og segir í tilkynningu ráðuneytisins.

Lyfjaverðskönnun ASÍ sýndi nýlega að lyfjaverð er hátt á Íslandi og að lyfjafræðingar hjá markaðsráðandi lyfsölukeðjum láti undir höfuð leggjast að benda á ódýrari samheitalyf sem hafa sömu virkni og eru jafngóð og frumlyfin en bara ódýrari.

"Frumlyfin hafa lækkað verulega með samningum við þá sem selja frumlyfin en takmarkað magn af samheitalyfjum er flutt inn. Misbrestur er á því að ódýrari samheitalyf séu hér á markaði," segir Siv og hefur efasemdir um árangur markaðslögmálanna við að ná niður lyfjaverði.

"Þegar maður horfir á muninn á verði lyfja hér og erlendis þá virðist markaðurinn ekki hafa skilað lægra verði. Það er mjög sérstök staða að þurfa að fara að flytja inn lyf með innkaupasamlagi en hugsanlega eina svarið miðað við þá stöðu sem við erum í í dag," segir hún.

Hreggviður Jónsson, forstjóri Vistor, segir að sér lítist ekkert á það að ríkið setji upp innkaupasamlag. Ríkið ætti að kanna hvort markaðurinn hafi brugðist, velta fyrir sér hvers vegna ef svo reynist vera og hvaða úrræði séu þá til staðar.

"Ég fæ ekki séð af hverju ríkið ætti að geta gert þetta betur en einhver annar," segir hann og bætir við að lyfjaverð á frumlyfjum sé orðið lægra hér en í Danmörku.

Hjalti Sölvason, framkvæmdastjóri Lyfja og heilsu, mótmælir því harðlega að lyfjafræðingar standi sig ekki í stykkinu við að benda á ódýrari samheitalyf. Það komi berlega í ljós í könnun ASÍ.