Með tugi kílóa í farangrinum

Nokkuð er um að Íslendingar hafi með sér tugi kílóa af erlendri matvöru þegar þeir snúa heim úr ferðalögum í Bandaríkjunum og Evrópu. Lög kveða skýrt á um að ekki megi flytja meira en þrjú kíló matvæla til landsins en reglugerð sem hugsuð var fyrir vísindaleiðangra hefur verið túlkuð vítt svo fólk geti haft matvælin með sér inn í landið. Kári Gunnlaugsson hjá Tollstjóraembættinu í Keflavík segir að ekki hafi verið amast við því að fólk flytji meira inn en nemur almennu heimildinni í lögum. Undanþága frá takmörkununum er fyrir hendi og þarf þá að greiða 125 krónur fyrir hvert kíló umfram leyfilegt hámark innfluttra matvæla. Kári segir að strangt til tekið eigi reglugerðin aðeins við um sérstök tilfelli, svo sem þegar vísindaleiðangrar koma til landsins, en henni hefur verið beitt í innflutningi fleiri einstaklinga þó að þeir falli ekki undir hana. Kári segir að það séu aðallega flugáhafnir og fólk sem ferðast mikið sem nýti sér umrædda undanþágu, tollstjóraembættið hafi ekki séð ástæðu til að stöðva þennan innflutning þótt hann tengist vísindaleiðöngrum á engan hátt. Fermingar eru í nánd og veit Fréttablaðið til þess að fólk hafi keypt inn í fermingarveislur á ferðalögum sínum vestur um haf. Viðmælandi Fréttablaðsins, sem er nýkominn frá Bandaríkjunum, segist hafa keypt tuttugu kíló af kjöti á rúmlega níu þúsund krónur og þar af hafi sex kílóa skinkubiti kostað um 845 krónur. Til samanburðar má geta þess að kílóið af skinku kostar um 700 krónur í lággjaldavöruverslunum á höfuðborgarsvæðinu.