Starfsmenn hætta í Landakotsskóla

Ingibjörg Kjartansdóttir, forstöðumaður heilsdagsskólans í Landakotsskóla, sagði upp störfum í vikunni vegna ástandsins í Landakotsskóla. Annar starfsmaður heilsdagsskólans hefur einnig sagt upp störfum, en alls vinna þrír við hann. "Það er eftirsjá af Ingibjörgu sem hefur verið mjög góður starfsmaður," segir Björg Thorarensen, formaður stjórnar skólans. Samkvæmt heimildum Fréttablaðsins voru engin mál sem sneru beint að heilsdagsskólanum sem ollu uppsögninni. Þessir starfsmenn höfðu báðir lýst því yfir á foreldrafundi í byrjun sumars að þeir væru að íhuga uppsögn vegna deilnanna í skólanum. Ingibjörg staðfesti það í samtali við Fréttablaðið í gær að hún hefði sagt upp en vildi að öðru leyti ekki tjá sig um málið. Þeim foreldrum sem Fréttablaðið ræddi við í gær bar öllum saman um að uppsögn hennar væri reiðarslag fyrir skólann og að mjög mikil ánægja hefði verið með hennar störf.