Leiðtogaslagur á báðum vígstöðvum

Það stefnir í leiðtogaslag í R-listanum ef hann hangir saman fram að næstu kosningum. Bæði Steinunn Valdís Óskarsdóttir og Stefán Jón Hafstein segjast vilja borgarstjórastólinn. Þegar fréttastofan bar það undir Steinunni Valdísi hvort hún ætlaði að bjóða sig fram til áframhaldandi setu í borgarstjórastóli að því gefnu að samstarfi R Listans yrði haldið áfram, var svarið afdráttarlaust JÁ. Stefán Jón Hafstein var ekki jafn afdráttarlaus þegar sama spurning var borinn undir hann, og hann sagði ákvörðun sína ráðast af því hvernig valið á leiðtoga listans færi fram. Hann dró hins vegar ekkert úr áhuga sínum fyrir starfinu og sagðist gjarnan vijla gegna því. Hins vegar hafi þær aðferðir sem notaðar voru síðast þegar borgarstjórinn var valinn, verið honum mjög á móti skapi og alls óvíst væri að hann myndi gefa kost á sér í sæti á listanum yfir höfuð ef slíkar aðferðir yrðu eftur notaðar. Á orðum hans er því ekki hægt að skilja annað en að ef farið yrði í opið prófkjör myndi hann taka slaginn. Það er því ljóst að ef borgarbúar fá sjálfir að velja leiðtoga R Listans, munu nöfn bæði Steinunnar og Stefáns verða á kjörseðlunum. Oddviti sjálfstæðisflokksins segir allt bröltið hjá R Listanum upp á síðkastið sýna svo ekki verði um villst að hann sé endanlega orðinn að bandalagi um völd. Sjálfur segist Vilhjálmur ætla að bjóða sig fram sem leiðtoga sjálfstæðismanna á næsta ári. Þar á bæ er talið næsta víst að hann fái mótframboð og hefur Gísli Marteinn Baldurson þar helst verið nefndur til sögunnar. Það stefnir því í leiðtogaslag á tvennum vígstöðum í aðdraganda borgarstjórnarkosninganna á næsta ári.