Skyndibitastaður og kavíarbar

Hvers konar skip er Sea Princess? Skipið var smíðað á Ítalíu fyrir breskt fyrirtæki og hélt í jómfrúrsiglingu sína 19. desember 1998. Það tekur 1.950 farþega en áhafnarmeðlimir eru níu hundruð. Smíði og hönnun þess kostaði tæpa tuttugu milljarða í íslenskum krónum talið. Hvað er um borð? Í skipinu eru 975 vistarverur fyrir farþega, þar af eru sex svítur og 32 minni svítur með svölum. Nítján vistarverur eru sérhannaðar fyrir fatlaða. Tveir stórir matsalir eru í skipinu og kaffihús sem opið er allan sólarhringinn. Þar að auki er fjöldi veitingarstaða við flestra hæfi, allt frá vín- og kavíarbar til skyndibitastaðar sem bíður upp á hamborgara. Svo eru fimm sundlaugar um borð en þar af er ein fyrir áhafnarmeðlimi. Á hvaða ferðalagi er skipið? Þetta ferðalag tekur fjórtán daga en lagt var af stað frá London en síðan haldið til Óslóar og annarra hafna í Noregi. Þaðan er svo farið til Þórshafnar í Færeyjum og því næst til Reykjavíkur. Síðdegis í gær lét svo skipið úr Reykjavíkurhöfn og mun sækja Akureyringa heim á morgun. Að þeirri heimsókn lokinni verður stefnan tekinn aftur til London með viðkomu í Glasgow og Dublin. Sea Princess er annað þeirra listiskipa sem lágu fyrir utan Reykjavíkurhöfn í gær og munu Akureyringar njóta nærveru þess í dag. Þessi tignarlega sjón vakti forvitni fjölmargra borgarbúa um þetta tignarlega ferlíki.