Skilar sér í hægari akstri

Hert umferðareftirlit á þjóðvegum landsins skilar sér í hægari akstri að sögn lögreglu. Lögreglan í Borgarnesi segir greinilegan mun á því að færri séu teknir fyrir of hraðan akstur nú en í upphafi átaksins, sem hófst 28. júní. Lögreglan á Hvolsvelli tekur í sama streng og segir heldur að draga úr hraða á þjóðvegunum. Aðra viku umferðareftirlitsins voru 202 ökumenn kærðir fyrir of hraðan akstur, samanborið við tæplega 250 í fyrstu vikunni. Hertu eftirliti verður haldið áfram til 1. október.