Nýtt leiðakerfi strætó

Sameiginlegu og samræmdu leiðarkerfi almenningsvagna fyrir allt höfuðborgarsvæðið verður komið á laugardaginn 23. júlí. Þessar breytingar voru kynntar á fundi Strætó BS í morgun. Nýja leiðarkerfið tekur mið af aðferðarfræði sem víða þekkist erlendis og byggist á stofnleiðum og að sérstaklega sé hugað að farþegum sem þurfi að komast leiðar sinnar á morgnana og síðdegis. Strætisvagnar á stofnleiðum munu aka á allt að 10 mínútna fresti á álagstímum þannig að ferðatími flestra sem taka strætó í vinnu eða skóla styttist. Strætóleiðir nýja leiðakerfisins skiptast í þrjá flokka eftir eðli og umfangi þjónustunnar. Sex stofnleiðir flytja fólk milli fjölmennustu íbúðasvæðanna og fjölmennustu atvinnusvæðanna. Sex almennar leiðir aka um fjölmenn hverfi á höfuðborgarsvæðinu og tengja þau saman. Vagnar á almennum leiðum hafa allir viðkomu á Hlemmi og flestir einnig á Lækjartorgi. Loks munu vagnar á sjö hverfaleiðum aka um tiltekin hverfi eða sveitarfélög án þess að fara um miðborg Reykjavíkur. Samhliða kynningu nýja leiðakerfisins verður gefin út leiðabók og henni dreift til allra heimila á höfuðborgarsvæðinu.