Hrefnukjöt nýtur vaxandi vinsælda

"Það er vaxandi eftirspurn og greinilegt að almenningur er ekki feiminn að prófa hrefnuna," segir Jón Björnsson í Nóatúni í Smáralind. Mikill munur er á verðum lamba- og nautakjöts annars vegar og hrefnukjöts hins vegar og er munurinn allt að þrefaldur. Í Nóatúni er kílóverð á lambi og nauti tæpar 3.000 krónur en kíló af sambærilegu hrefnukjöti er á 1.298 krónur. Er því afar hagstætt að kaupa hrefnukjöt ef heimilisfólk á annað borð leggur það sér til munns. Jón segist finna fyrir meiri áhuga á hrefnukjöti nú en undanfarin ár. "Þjóðin er orðin svo sigld í dag og flestir óhræddari við að prófa nýjungar en áður og það verður að segjast að fyrir nýjustu kynslóðina þá er hrefnukjötið algjör nýjung. Það er þó áberandi hvað margir eru tilbúnir að prófa það og þá kannski sérstaklega á grillið."