Vó aðeins 300 grömm við fæðingu

Stúlkubarn sem fæddist rúmum þremur mánuðum fyrir tímann í Bandaríkjunum í síðustu viku vegur aðeins rúmlega þrjú hundruð grömm. Læknar telja góðar líkur á að barnið lifi. Dakota Juanita Guido fæddist á sjúkrahúsinu í Buffalo í New York í síðustu viku, fjórtán vikum fyrir tímann. Hún er í öndunarvél í hitakassa og sérstök slanga sér henni fyrir næringu. Læknar á sjúkrahúsinu segja að Dakota hafi náð að dafna vel síðustu daga og þeir eru bjartsýnir á framhaldið, þótt útlitið hafi verið slæmt í byrjun.  Dr. Rita Ryan, fæðingarlæknir á sjúkrahúsinu, segir börn sem fæðast svona snemma á sjúkrahúsinu, eða eftir 26 vikna meðgöngu, hafa um 90% lífslíkur. Flestum þeirra vegni vel. Dakota var svo smá þegar hún fæddist 14 að faðir hennar gat sett giftingarhring sinn utan um handlegg hennar við axlirnar, án þess að snerta húð hennar. Hún vegur aðeins um 300 grömm, eða jafn mikið og einn pakki af Smjörva. Foreldrar stúlkunnar geta enn um sinn ekki fengið að halda á henni, meðal annars vegna sýkingarhættu, en þeir geta snert hana í gegnum göt á hitakassanum.