Bilun í netkerfi Landspítalans

Bilun kom upp í netkerfi Landspítalans um hádegi í dag og hefur öll þjónusta spítalans á Netinu legið meira og minna niðri eða verið mjög hægvirk. Flest upplýsingakerfi Landspítalans hafa legið niðri en bilunin kom aðallega niður á símkerfinu; spítalinn var meira og minna símasambandslaus. Þetta hefur ekki haft áhrif á svokölluð „Life Critical“ kerfi sem snerta meðal annars vöktun á gjörgæslu. Þau standa utan netkerfisins og eru rekin sér. Að sögn Ingólfs Þórissonar, framkvæmdastjóra tæknisviðs Landspítalans, hefur bilunin truflað starfsemina og segir hann allt gert til að tryggja öryggi innan spítalans. Talið er að annað hvort hafi tæki bilað eða vírus hafi komist inn á kerfið.