Embættismaður skotinn til bana

Háttsettur embættismaður í olíumálráðuneyti Íraks var skotinn til bana í Bagdad í morgun. Atburðurinn átti sér stað þegar maðurinn var að ganga út af heimili sínu og á leið í vinnuna. Engin samtök hafa lýst verknaðinum á hendur sér en unnið er að rannsókn málsins. Hryðjuverkamenn hafa verið iðnir við að ráðast gegn embættismönnum í olíugeiranum. Þá hafa þeir einnig sprengt upp ótal olíuleiðslur en olía er helsta auðlind landsins og því mikið tjón fyrir landið þegar hryðjuverk sem þessi eru framin.