Kjarasamningum sagt upp?

Miðstjórn Samiðnar telur forsendur kjarasamninga brostnar miðað við núverandi verðbólgu og ástand efnahagsmála. Formaður Samiðnar segir að nái endurskoðunarnefnd um forsendur kjarasamninga ekki viðunandi niðurstöðu, komi ekki annað til greina en að segja upp samningum. Miðstjórn Samiðnar, sem fundaði í Vestmannaeyjum í gær, lýsir yfir þungum áhyggjum af afkomu heimila félagsmanna sinna. Hún bendir á að á sama tíma og mörg fyrirtæki og bankar hagnist um stjarnfræðilegar upphæðir hafi aðeins lítill hluti félagsmanna aðildarfélaga Samiðnar fengið launahækkanir sem haldi í við verðbólgu. Og fyrir liggi að stærstur hluti þeirra hafi orðið fyrir kaupmáttarrýrnun. Miðstjórn Samiðnar telur að forsendur kjarasamninga séu brostnar miðað við núverandi verðbólgu, ástand efnahagsmála og launaþróun annarra hópa og hvetur hún verkalýðshreyfinguna til að vera samstíga í aðgerðum við að rétta hlut launafólks á almennum vinnumarkaði. Finnbjörn A. Hermannsson, formaður Samiðnar, segir að gangi það ekki eftir að endurskoðunarnefnd um forsendur kjarasamninga nái ásættanlegri niðurstöðu verði hvatt til uppsagnar á kjarasamningum og þá þurfi að setjast að samningaborðinu á nýjan leik. Áhyggjurnar byggist á því að verðbólgan sé komin upp undir 4% en stærstur hluti félagsmanna hafi ekki fengið kauphækkun sem því nemi. Þeir verði því fyrir kaupmáttarrýrnun og vilja bætur. Félagið hvetur og önnur aðildarfélög til að vera samstíga Samiðn í þessu máli. Finnbjörn segir að launafólk í ASÍ verði að bregðast við þeirri launafrystingu sem hafi orðið með gegndarlausum félagslegum undirboðum sem felist í innflutningi á erlendu vinnuafli en það fái ekki greidd mannsæmandi laun og hafi ekki sömu réttindi og íslenskir starfsmenn. Miðstjórn Samiðnar krefst þess að stjórnvöld að setji skýrari reglur varðandi starfsmannaleigur og svokallaða þjónustusamninga sem notaðir séu sem skjól við að lækka laun í landinu.