Margir sækjast eftir efsta sætinu

Allt eins getur farið að þrír eða fleiri muni keppa um fyrsta sætið í prófkjöri sjálfstæðismanna í Reykjavík í haust. Enginn hefur þó lýst því opinberlega yfir að hann gefi kost á sér til forystu fyrir flokkinn í Reykjavík að undanskildum Vilhjálmi Þ. Vilhjálmssyni, oddvita borgarstjórnarflokksins. "Ég leiði hópinn í dag og tel mig hafa ágæta þekkingu, reynslu og áhuga til að sinna því starfi vel og gef því kost á mér áfram," segir Vilhjálmur. Júlíus Vífill Ingvarsson, fyrrverandi borgarfulltrúi, er einn þeirra sem eru að íhuga framboð. "Ég hef notað undanfarna daga til að ræða við menn og konur og þær samræður hafa verið mjög ánægjulegar. Ég tek á næstunni endanlega ákvörðun," segir hann. Gísli Marteinn Baldursson varaborgarfulltrúi ætlar að taka þátt í prófkjörinu en segir óvíst hvort hann stefni á efsta sætið. "Það er ekki kominn sá tímapunktur fyrir mig að tilkynna að ég stefni á tiltekið sæti en ég stefni á eitthvert gott sæti og vona að ég fái stuðning í það," segir Gísli Marteinn. Fastlega er búist við því að Gísli Marteinn muni gefa kost á sér í efsta sætið og sama má segja um Júlíus Vífil ef hann tekur á annað borð þátt. Nafn Guðlaugs Þórs Þórðarsonar borgarfulltrúa hefur einnig verið nefnt. Aðrir borgafulltrúar flokksins staðfestu í samtali við Fréttablaðið að þeir myndu taka þátt í prófkjörinu að Birni Bjarnasyni undanskildum en ekki náðist í Guðrúnu Ebbu Ólafsdóttur. Enginn þeirra er þó talinn ætla að blanda sér í slaginn um efsta sætið eftir því sem næst verður komist enda ljóst að fyrir eru sterkir frambjóðendur sem munu ætla sér að leiða lista sjálfstæðismanna. Allur undirbúningur er þó á byrjunarstigi enda prófkjörið haldið í haust. Nokkur nöfn hafa einnig verið nefnd meðal nýrra frambjóðenda, þar á meðal nafn Þorbjargar Helgu Vigfúsdóttur varaborgarfulltrúa sem sagði í samtali við Fréttablaðið að hún væri að íhuga alvarlega að gefa kost á sér. "Ég er að skoða málin þessa dagana," sagði Þorbjörg.