Náttúrulegar vörur inni

"Þetta eru virkilega góðar fréttir," segir Jóhannes Sigfússon, bóndi á Gunnarsstöðum á Langanesi og formaður Landssambands sauðfjárbænda. Fréttablaðið greindi frá því í gær að íslenska lopapeysan væri komin í tísku á ný og að sala á lopa hefði stóraukist. Gunnar er vitaskuld hrifinn af þróuninni og hefur sína kenningu um ástæðurnar. "Eru ekki náttúrulegar vörur inni, eins og sagt er? Ég held að vörur úr íslenskri ull njóti þess að vera náttúrulegar, fólk vill ganga í slíkum vörum." Ekki er við því að búast að hagur sauðfjárbænda vænkist að ráði bara vegna aukinna vinsælda lopapeysunnar en hver kind gefur af sér um tvö kíló af ull, sem dugar í tvær peysur. Jóhannes sér þó fyrir sér að sala á ull í íslensku sauðalitunum geti vaxið. "Íslensku sauðalitirnir þykja sérstakir og útlendingar eiga erfitt með að trúa að þeir séu náttúrulegir." Sjálfur er Jóhannes mikill lopaleysukall og segir þær meðal sinna bestu flíka. "Ég á einar þrjár lopapeysur og ein þeirra er betri peysa," segir hann og tekur fram um leið að enga eigi hann flíspeysuna. "Ég hef ekki mikið uppáhald á flísinu. Ef þú ert í góðri stormþéttri úlpu og lopapeysu innan undir ertu í mjög góðum málum og þannig klæddur fer ég til dæmis í göngur." Að sama skapi notar hann ullarvettlinga að ógleymdum lopasokkunum, "sem eru nú það besta sem til er".