Samningaviðræður hangi á bláþræði

Samningaviðræður SFR við Samtök fyrirtækja í heilbrigðisþjónustu (SFH) hanga nú á bláþræði eftir að samninganefnd SFH tilkynnti seint í gærkvöld þegar nýr samningur lá fyrir að hún treysti sér ekki til að skrifa undir, en samningafundur hafði þá staðið allan daginn. Í frétt á heimasíðu SFR kemur fram að það skýrist á hádegi í dag hvort SFH hafi slitið viðræðunum eða hvort samtökin staðfesti samninginn með undirskrift. Jens Andrésson, formaður SFR, segir framkomu SFH með eindæmum og óttast að slitna muni upp úr viðræðunum. Atkvæðagreiðsla um boðun verkfalls SFR-félaga sem vinna hjá 11 stofnunum innan SFH hefst í dag. Jens segir ljóst að komi til verkfalls verði sá samningur sem unnið hefur verið að undanfarið ekki lengur til viðræðu heldur verði byrjað upp á nýtt og sett fram ný kröfugerð.