Titillinn vekur heimsathygli

Allir helstu norrænu fjölmiðlarnir og fleiri til fjalla um sigur Unnar Birnu Vilhjálmsdóttur í Miss World fegurðarsamkeppninni.

Spiegel kallar hana fegurðardrottninguna sem kom inn úr kuldanum og Extrablaðið segir hana perlu Norður-Atlantshafsins. Haft er eftir Unni í fréttaskeytum að hún hafi farið eftir ráðleggingum móður sinnar, sem hefur sjálf tekið þátt í sömu keppni. Ráðin voru að vera hún sjálf og slappa af. Unnur Birna segir að þetta hafi virkað. Breska slúðurblaðið Sun slær því upp að Ís-jómfrúin hafi sigrað keppnina og þýska fréttatímaritið Fókus minnist á að hún sé lögreglukona og gætir þess misskilnings í frétt þeirra að Unnir beri vopn við störf sín.