Seðlabankinn hafi ekki haft ástæðu til að hækka vexti

Forsætisráðherra segist ekki telja að Seðlabankinn hafi haft ástæðu til hækka vexti. Hækkunin sé hins vegar minni en bankarnir hafi reiknað með og það sé jákvætt að því sé ekki lýst yfir að framhald verði á vaxtahækkunum.

Staða hátæknifyrirtækja hefur verið mikið í umræðunni ekki síst eftir að Hjartavernd ákvað að segja upp 35 starfsmönnum. Samtök iðnaðarins hafa kallað eftir sértækum aðgerðum ríkistjórnarinnar vegna stöðu þessara fyrirtækja sem hefur skapast vegna hás gengis krónunnar. Auka stuðning við rannsóknir og þróun á sama hátt og tíðkast í nágrannalöndunum og draga úr gengissveiflum.

Aðspurður hvort til greina komi að grípa til sértækra til bjargar hátæknifyrirtækjum segir Halldór að stjórnvöld hafi verið að því með því að efla samkeppnissjóði en ekki sé hægt að breyta genginu sérstaklega fyrir fyrirtækin frekar en önnur.

Spurður um viðbrögð við vaxtahækkun Seðlabankans fyrr í dag segir Halldór að hann hafi sagt það áður að hann teldi ekki ástæðu til að breyta vöxtunum og hann standi við það. Hins vegar hafi hækkunin verið minni en bankarnir hafi reiknað með en hann telji það jákvætt að það komi ekki fram hjá Seðlabankanum að hann ætli sér að halda áfram að hækka vexti. Því telji hann að um stefnubreytingu hjá Seðlabankanum sé að ræða og hann fagni því.