Gagnrýnir Valgerði fyrir aðgerðaleysi

Kristinn H. Gunnarsson, þingmaður Framsóknar, gagnrýnir Valgerði Sverrisdóttur, iðnaðarráðherra og flokkssystur sína, harðlega fyrir aðgerðaleysi í málefnum Byggðastofnunar. Hann segir að ljóst hafi verið um síðustu áramót að stofnunin kynni að þurfa að hætta lánveitingum á árinu vegna lakrar eiginfjárstöðu en að iðnaðarráðherra hafi ekkert gert.

Kristinn H. Gunnarsson segir í pistli á heimasíðu sinni að aðgerðarleysi Valgerðar Sverrisdóttur iðnaðarráðherra og ríkisstjórnarinnar í heild sinni í málefnum Byggðastofnunar hafi komið sér á óvart. Eigið fé stofnunarinnar hafi farið lækkandi síðustu ár og því hafi verið fyrirsjáanlegt að hætta yrði lánveitingum ef ekkert væri gert í málinu. Annað hvort þyrfti að leggja stofnuninni til fé eða létta af henni skuldum en hvorugt hafi verið lagt til við gerð núverandi fjárlagafrumvarps. Þetta segir Kristinn algerlega óásættanlegt og að á venjulegri íslensku heiti þetta að láta reika á reiðanum.

Kristinn segir yfirlýsingar iðnaðarráðherra um stuðning við Byggðastofnun vera loðnar og svör hennar um hvert skuli stefna enn loðnari.