Baugsmálið tekið fyrir á mánudag

Ákæruliðirnir átta sem eftir standa í Baugsmálinu verða teknir fyrir í Héraðsdómi Reykjavíkur á mánudag. Öllum ákæruliðunum fjörutíu var vísað frá Héraðsdómi í september en ákæruvaldið áfrýjaði úrskurðinum til Hæstaréttar. Þar var svo öllum ákærunum nema átta vísað frá.

Ákæruliðirnir sem eftir standa varða meint brot á almennum hegningarlögum, tollalagabrot og lög um ársreikninga. Meðal þess sem forsvarsmönnum Baugs er gefið að sök í þeim ákærum er innflutningur á bílum án greiðslu tilskilinna gjalda og fyrir að setja fram ársreikninga á rangan og villandi hátt á þriggja ára tímabili.

Þá verður lögbannskrafa Jónínu Benediktsdóttur á fréttaflutning Fréttablaðsins, sem byggður var á tölvupósti, tekinn fyrir í Héraðsdómi á morgun. Jónína krefst skaðabóta og refsingar yfir Kára Jónassyni, ritstjóra blaðsins.