Finnast löngu eftir lát sitt

Nokkrum sinnum á ári finnst fólk á heimilum sínum í Reykjavík eftir að hafa legið þar látið í vikur eða jafnvel mánuði áður en einhver veitir því athygli. Í vikunni fannst maður á áttræðisaldri látinn á heimili sínu í miðbæ Reykjavíkur. Talið er að hann hafi látist fyrir þremur vikum síðan. Þetta er ekki einsdæmi því ekki er nema hálfur mánuður síðan einstaklingur sem hafði verið látinn í fimm daga fannst á heimili sínu. Þá eru aðeins um tveir mánuðir síðan annar einstaklingur fannst þremur mánuðum eftir andlát hans. "Þettu eru nú aðallega einstæðingar," segir Hörður Jóhannesson, yfirlögregluþjónn í Reykjavík. "Þetta eru sjúklingar, fólk sem er ekki í vinnu, jafnvel öryrkjar og fólk sem virðist vera félagslega einangrað og er ekki í reglulegum samskiptum við aðra." Hörður segir það gerast nokkrum sinnum á ári að einstaklingar finnist á heimilum sínum vikum eftir andlát sitt. Þeir sem helst tilkynna að eitthvað sé athugavert eru nágrannar, vinir og fjarskyldir ættingjar. Margir þeirra sem finnast látnir eftir langan tíma búa í nokkuð miklu návígi við aðra, eins og í fjölbýlishúsum. Hafdís Guðjónsdóttir, framkvæmdastjóri Þjónustumiðstöðvar Miðbæjar og Hlíða segir suma sem búa eina fá litla þjónustu inn á heimili sín. Hjá sumum kemur aðeins manneskja til að þrífa á hálfs mánaðarfresti og stundum engir þess á milli. "Yfirleitt er regla að hringja og reyna að hafa uppi á fólki. Í langflestum tilvikum er það svo að fólk gleymir að láta vita að það vilji ekki þjónustu þennan dag," segir Hafdís. Hjá þjónustumiðstöðvunum í Reykjavík er unnið að því að byggja upp öflugt hverfastarf. Oft og tíðum hefur fólk misst tengsl við fjölskylduna og því getur verið mikilvægt að huga að nágrönnum sínum.