Hættir að taka við sjúklingum

Sjálfstætt starfandi hjartasérfræðingar íhuga nú að segja upp samningi við Tryggingastofnun ríkisins, að sögn Axels Sigurðssonar sem sæti á í stjórn Félags sjálfstætt starfandi hjartalækna. Þeir eru farnir að stöðva bókanir þar til eftir áramót, nema mikið liggi við. Þetta á sér einnig stað í öðrum sérfræðigreinum. Þá eru sjálfstætt starfandi sérfræðilæknar í þann mund að fækka viðverudögum sínum á stofu. Ástæða þessa er sú að einingakvóti sá sem sjálfstætt starfandi sérfræðilæknar hafa, samkvæmt samningi við Tryggingastofnun ríkisins, er að mestu uppurinn. Ef læknar fara fram úr þessum kvóta þurfa þeir að gefa TR fimmtíu prósenta afslátt af sinni vinnu. „Málum hefur verið þannig háttað að hafi sumar sérfræðigreinar ekki nýtt sinn kvóta að fullu þá hafa aðrar sérfræðigreinar fengið þann ónýtta kvóta," segir Axel. „Það sem er óvenjulegt núna er að útreikningar benda til þess að flestar sérgreinar fullnýti kvótann og fari fram úr honum. Ákvæði í samningnum kveður á um að ef heildarkvótinn stefnir fram úr þá sé kominn á 100 prósenta afsláttur, sem þýðir að Tryggingastofnun borgar ekki krónu. Í þetta stefnir nú." Axel segir að Tryggingastofnun hafi sent sérfræðilæknum bréf í sumar og bent þeim á að draga úr þjónustunni þar sem stefni í óefni. Ekki sé við stofnunina að sakast, hún fari eftir samningum. Hins vegar hafi eftirspurn eftir þjónustu margra sérfræðigreina aukist verulega og læknar séu aðeins að bregðast við henni.