Kosið um sameiningu á morgun

Ólíklegt er að Reykjanesbær, Garður og Sandgerði sameinist í eitt bæjarfélag í kosningunum á morgun. Sömu sögu er að segja af Árborg, Hveragerði, Ölfusi, Gaulverjabæjarhreppi, Hraungerðishreppi og Villingaholtshreppi á Suðurlandi - sem og níu sveitarfélögum á Eyjafjarðarsvæðinu. Flestir eru á kjörskrá í Hafnarfirði eða rúmlega fimmtán þúsund manns - en fæstir í Mjóafjarðarhreppi, þar sem aðeins eru 38 á kjörskrá. Lítill vilji virðist vera á Suðurlandi fyrir því að sex sveitarfélög í Ölfusi og Flóa sameinist í eitt í kosningunum á morgun. Þá er einnig talið líklegt að sameining verði að engu á Suðurnesjum og sömu sögu er að segja um sameiningarnar í Eyjafirði. Atkvæðagreiðsla fer fram um 16 sameiningartillögur í 61 sveitarfélagi á 80 kjörstöðum. Um 70 þúsund manns eru á kjörskrá en verði sameiningar samþykktar fækkar sveitarfélögum á landinu úr 92 í 47. Búist er við góðri kosningaþátttöku í öllum sveitarfélögunum en flestir eru á kjörskrá í Hafnarfirði eða rúmlega fimmtán þúsund manns. Þar er kosið um sameiningu við Voga á Vatnsleysuströnd. Fæstir eru á kjörskrá í Mjóafjarðarhreppi eða 38 manns. Andstæðingar sameiningar benda á að stjórnsýsla verði fjarlægari ef af sameiningunni verður. Fylgjendur sameiningar benda þó á að stjórnsýslan verði skilvirkari, betur sé hægt að standa að löggæslu, heilsugæslu og málefnum fatlaðra í stærri sveitarfélögum svo einhver dæmi séu tekin. Jöfnunarsjóður fær 2,4 milljarða króna sem afhentir verða nýjum sveitarfélögum til að þróa stjórnsýslu sína og þjónustu næstu fögur ár eftir sameiningu en tveir þriðju íbúa á hverju svæði verða að samþykkja sameiningu svo hún geti gengið í gegn. Árni Magnússon félagsmálaráðherra er ekki of bjartsýnn. Hann segir að það verði að koma í ljós hvernig fari. Íslendingar hafi þá sérstöðu að fara þessa lýðræðislegu leið og fólkið kveði upp sinn dóm. Niðurtaðan verði sú sem hún verði og unað verði við. Síðast hafi verið kosið um sameiningu sveitarfélaga fyrir rúmlega 12 árum. Þá hafi sameining verið samþykkt í rúmlega 60 sveitarfélögum en úr hafi orðið aðeins sameining vegna þess að neitunarvaldið sé mjög ríkt. Árni segir að framtíðina alveg skýra að hans mati, sveitarfélögin muni halda áfram að sameinast og halda áfram að stækka og verða burðugri til að veita góða þjónustu. Aðspurður hvort hann telji líklegt að það gerist í þetta sinn segist Árni engu vilja spá um það. Ljóst er að tilfinningar fólks spila stóran þátt í máli þessu sem og fjárhagsstaða bæjanna sem er mjög misjöfn, en þessir tveir þættir eru taldir munu ráða niðurstöðum kosninganna á morgun.