Gagnrýndu framkvæmd kosningar

Þingmenn Frjálslynda flokksins gagnrýndu harðlega kosningu forseta Alþingis við þingsetningu á laugardag. Gagnrýndu þingmenn meðal annars framkvæmdina og segjast ekki hafa getað sagt nei því svokallaður nei-hnappur hafi ekki virkað. Helgi Bernódusson, skrifstofustjóri Alþingis, sagði í dag við fréttastofu Stöðvar 2 að aldrei áður hefði komið fram gagnrýni á fyrirkomulag kosningar forseta Alþingis. Þessi kosning á þó að vera skriflega atkvæðagreiðsla samkvæmt þingsköpum. Sá háttur hafi hins vegar ekki verið hafður á síðastliðin tíu ár enda hefur ekki komið fram mótframboð síðan árið 1991. Aðspurð um gagnrýni þingmanna Frjálslynda flokksins vegna þess hvernig staðið var að kosningunni segir Arnbjörg Sveinsdóttir, þingflokksformaður Sjálfstæðisflokksins, að hún sé á misskilningi byggð. Sú kosning sem fram hafi farið á forseta Alþingis sé í raun ígildi skriflegrar kosningar. Ef farið hefði verið eftir forminu og skriflegar kosningar hefðu farið fram þá hefði þurft að skrifa nafn þeirra sem tilnefndir hafi verið, en í þessu tilfelli hafi það aðeins verið Sólveig Pétursdóttir. Rafræna aðferðin hafi verið ígildi skriflegrar kosningar. Gagnrýni þingmanna Frjálslynda flokksins var ekki eingöngu bundin við framkvæmd kosningarinnar. Á heimasíðu Magnúsar Þórs Hafsteinssonar segir þingmaðurinn orðrétt: „Enginn okkar þriggja í þingflokki Frjálslynda flokksins greiddi Sólveigu Pétursdóttur atkvæði okkar. Þetta gerðum við í mótmælaskyni við þann valdhroka meirihlutans sem felst í því að lýsa því fyrirfram yfir hver eigi að verða þingforseti. Okkur þykir líka algerlega ófært að Sólveig Pétursdóttir gegni þessu embætti á meðan olíusamráðsmálið þar sem eiginmaður hennar var í lykilhlutverki, hefur ekki verið til lykta leitt.“ Aðspurð um þessa gagnrýni segir Arnbjörg þingmenn séu kjörnir á þing og standi fyrir sínu hver og einn. Önnur mál, fjölskyldu þeirra eða hvað annað sem upp kunni að koma, sé ekki mál þings eða þingflokks með neinum hætti.